Peanut Butter Chips and Marshmallow Brownie :D

اليوم قمت الظهر و انا متحمسه لليوم الاول ~*.*~ و طلعت الزبده عشان تصير لينه للبراوني اليوم 

المهم عاد يوم جا العصر قعدت اجهز الاغراض وكذا و فجأه اكتشفت انه خلصت بودرة الكاكاو :) ارتفع ضغطي صراحتن اكره ما عندي انه يخلص شي زي كذا يعني المفروض هذا ما يخلص ياخي!! 

و المشكله بعد سواقنا مو موجود >.> ما يمدينا نرسله يجيب من البقاله بس لحسن الحظ اخوي الصغير نجاحته سيكل وقاعد يمتّر الحاره فقلتله يشتري لي .. بس صار شي يرفع الضغط :) عطيته 11 ريال ويوم راح وقعدت احتريه ساعه يروح من بقاله لبقاله ما لقاه اااخر شي يوم لقاه صار ب13 ريال :)!! واخوي ما عنده ولا ريال -___-!! اخر شي رجع للبيت و عطيته فلوس وراح مره ثانيه وشراه  كويس انه كان مروق ~*.*~ الززبده انه خلاص جهزت كل شي وكذا وبديت خمبقتي وسويت كل شي

 خلطت الزبده مع السكر الأبيض و البني  بعدين حطيت البيض مع الفانيليا .. و ذوبت تشوكلت  بالمايكرويف وخلطتها معه بعدين عاد حطيت الطحين و البكينج باودر و بودرة الكاكاو اللي حسرت بنا =)) وخلطتهم كلهم مع بعضهم البعض =)) الزبده دخلته الفرن ويوم طلع حطيت عليه مارشملو و تشوكلت تشيب و رايسيز *.* << للي ما يعرفه هذا بينت بتر .. المهم وحطيته بالفرن يمكن ثلاث او اربع دقايق وطلعته وخليته يبرد شوي وقطعته وصورته وهذي صورته

هو شكله شوي حوسه بس اهم شي الطعم ولا لا؟  الزبده .. صراحه عن نفسي طلع طعمه جممممميل جددن بس امي ما عجبها مره لانها ما تحب ذي الخرابيط والاشياء هذي =)) بس اخواني خاقين عليه وقامو يمدحون وكبر راسي وكذا :$ الزبده .. فيه ملاحظات و اشياء كذا ودي اقولها عشان تستفيدون يعني ^^ .. 

انا اشوف انه اهممم شي بالحياة انه الحلا او الكيك او اي شي تسوونه ما يلصق ابدن بالصينيه  فاشتروا ورق اسمه

"Parchment Paper" 

هذا ما يخلي اي شي يلصق بالصينيه اكثر شي يجيبلي السعاده صراحتن =))

وفيه بعد شي مره مهم  بالبراوني انه ما تطولون بالخلط بس تخلطون لين ما تشوفون انه خلاص كلش اختلط ببعض شي بسيط يعني مب لازم مرره يروح كل شي لان لو طولتوا بالخلط بيطلع مدري وشلون قايل كذا ثقيل وبعد ما يطلع من الفرن بيطلع زي الكيك او الخبز ما يطلع كويس ما اعرف اوصف صراحه بس عاد انتم اسمعوا الكلام وخلاص ياخي تعبت وانا احرك يديني ابي اشرح كيف يطلع شكله عجزت =))

الزبده استفدت من اليوم انه لازم اتأكد ان اخوي معه فلوس زياده عشان ما يقروشنا ويرفع ضغطنا مرتن اخرى  =))