Red Velvet Cheese Cake

DAAAY 29

ادري بتقولون بددددري يالحبيبه!!! بس عاد وش اسوي كنت مشغوله والله :$ بس ما خسرت التحدي ~*.*~يعني سويت من بنفس اليوم اللي قبل رمضان بس ما كتبت تدوينه المهم سويت رد فيلفت تشيز كيك مع اوريو عاد اللي يضحك بالموضوع اني سويت الحلا على انه كيك مو تشيز كيك! ما انتبهت زين للوصفه بعدين بعد ما سويته استوعبت انه تشيز كيك يالله لا تعمينا ,الزبده شكلي نسيت الطريقه بس بقول اللي اذكره ^^ اول شي اطحن اوريو لين يصير بودره بعدين اذوب معه شوي زبده وارصه بهذيك الصينيه ’امي تسميها "الصينيه ذو القاعده المتحركه" =)) الزبده بعدين اسوي التشيز كيك وهو اني اخلط كريم تشيز"فاليدالفيا" تصير دافيه ولينه مع سكر بعدين احط البيض واصير خالطته قبل بعدين احط كوكو باودر وساور كريم او زبادي اكتيفيا المخفوق بعدين حطيت شواااي خل وشوي فانيلا ولون طعام احمر بعدين صبيته بالصينيه اللي فيها الاوريو ودخلته الفرن درجة حراره 160 لمدة 10 دقايق بعدين وطيت الحراره لين 140 وخليته ساعه و15 دقيقه بعدين طلعته وخليته يبرد شوي برا يمكن نص ساعه كذا وبعدين دخلته الثلاجه 8 ساعات :) اقسم بالله طفش كل خطوه يبيلي اقعد سنه وست شهور اعوذ بالله بس قلت ما عليه المهم عاد اللي فوق حطيت كريم تشيز وشوي زبده "كلهم لينات" مع سكر بودره وشوي فانيلا وصبيته فوقه

طعمه كان لا بأس به مو مره حلو يمكن لاني ما احب التشيز كيك مره ويمكن لانه طولت وانا اسويه ^^ ,الزبده عاد, رمضضضان كريم ينعاد علينا وعليكم بالصحه والعافيه ان شاء الله وتقبل الله صيامكم وكذا يعني وكملت التحدي وسويت 29 طبخه *.* والحين قاعده احاول اني اضبط الماكرونز سويتها خمس مرات واليوم بسوي السادسه بعد لييين اضبطها ^^ قاعده ادور لي الوصفه الاصليه(˘  ˘) والححمد لله لقيتها وهي اللي بسويها اليوم ان شاء الله تضضضبط تعبت وانا كل مره اعيدها     

White Chocolate Blondies with Chocolate Peanut Butter Frosting

DAAAY 28 :"(

يا ربااااااه قلبي الصغير لا يتحممممل :"( هذا المفروض اخر يوم :"(عجزت استوعب! والله ما اصدق اني طبخت 28 طبخه! احس انجاز اقسم بالله دايم إذا سويت لنفسي تحدي ولا شي اخربه بالاخير مستحيل يكمل! بس هالمره كملتتته *فيس عيونه تلمع من الدموع* *دموع فرحه* =)) , بس بخلي بكرا اخر يوم ان شاء الله بسوي شي صعب شي كذا حماس يصير عشان احس انه كذا اخر يوم يعني وكذا,الزبده اللي عنده اقتراحات ولا شي يقولي عشان ادور وصفات كويسه وكذا يعني , الزبدااه ,,اليوم قعدت سنه وست شهور عشان ادور وصفه كويسه :\ >>خلصت كل الحلويات بالعالم=)) ويالله لقيت شي بالوايت تشوكلت~ سهل وبسيط وسبونج بوب وكذا يعني, اول شي ذوبت زبده "وخليتها تبرد قليلا" بعدين خلطتها مع سكر بني وفانيلا بعدين "فقشت" لي بيضه ^^ وخفقتها كويس وخلطتها مع الزبده والسكر ثمن خلطت معهم الطحين والبيكنق باودر والبيكنق صودا والملح وبعد ما انخلطوا كويس حطيت الوايت تشوكلت تشيب وصبيت الخليط الجميل بالصينيه "المربعة الشكل" بعد كذا طبعا دخلته الفرن الجميل "لا موب جميل قبيح -.- كم مره احرق طبخي -.- ,ما علينا المهم حطيته تقريبا 15 دغيغه لين تحمرت وبعدين سويت التشوكلت اللي فوق وهي عباره عن "تشوكلت تشيب" مع شوي زبده ذوبته بالمايكروويف وبعدين خلطت معه شوي بينت بتر وشوي فانيلا وكم ملعقة حليب و اخلطه كويس بعدين احط سكر بودره واخلطه من جديد لين ما يصير ما فيه اي كتل او شي زي تسذا واصبه فوق الشي اللي سويته قبل وادخل الصينيه بالفريزر شوي عشان يضبط التشوكلت وكذا بعدين طلعته من الفريزر ودخلته الثلاجه لين فضيت بعدين قطعته وضبطته وكذا يعني ^^       ء

طعمه ما عجبني مره صراحه :\ ,اختي عجبها بس انا احس ان اللي تحت موب مره زين جاي شووي قاسي  وانا كنت متخيلته بيصير مره لين فيمكن عشان كذا حسيته موب زين ^^ المهم عاد ايه صح احترق اصبعي -.- من اللمبه الله ياخذها >اهم شي اني حاقده عليها =)) , ادري بتقولون وش جابك للمبه بس كنت بجيب شي بالدولاب وفيه لمبه وحرقتني وكذا :( المهم ما علينا من اصبعي =)) اللي عنده اقتراح ولا شي يقولي الله يعافيه وكذا لان داخ راسي وانا ادور صراحه

Chocolate Chip Coffee Cookie Nutella Brownies

DAAAY 27

اليوم كان بيجينا ناس فقلت ابغا اسوي شي يعني مضمون كذا ^^ ما ابي اسوي شي غريب ولا شي صعب بعدين يخرب واتوهق فقلت بسوي بسيط وحلو عاد سويت شي جامع البراوني والكوكيز البراوني بالنوتيلا بالكوكيز بالكوفي وطريقته سهله مره ,اول شي اخلط زبده مع سكر بني وفانيلا وكوفي "اصير مذوبته بشوي مويه حاره" واخلطهم مع بعض كويس بعدين احط الطحين مع الملح والقرفه والبيكنق باودر واخلطهم زين لين تصير زي العجينه بعدين احط التشوكلت تشيب ,بعدين اخذ بملعقة الايس كريم واقسمه نصين عشان تطلع الكور متساويه واحطها بصينية الكب كيك واضغطها بصابعي لين تصير متساويه بعدين وخليت الصينيه على جنب وبديت اسوي البراوني مااااره سهل *.* ,بس نوتيلا وبيض وطحين وشوي ملح ,,اخلطهم مع بعض لين يروح الطحين واصبه فوق الكوكيز وادخله الفرن تقريبا 12 دقيقه بس عاد انا مدري وش قصة اممي صايره افهي بعدين يطول بالفرن -.- خليته يقعد يمكن 14 دقيقه وتحمر زياده "ما احترق ولا شي بس احس احسن لو ما خليته يطول اكثر من كذا

  

طعمه صراحه ما عجبني مره مدري كيف توقعته احلا بس هم عجبهم مره يقولون انه زين بس احس انه ناقصه شي مدري وشو وغير كذا خليته يطول بالفرن زياده 

-.-

Macarons

DAAAY 26

اليوم كنت ابغا اسوي شي غير! طفشت من المفن والكوكيز والاشياء ذي ابغا شي غير شوي , عاد قلت بسوي مكرونز *.* انا كم من مره اشوفه وكذا

 بس ما فكرت اني اسويه ابد احس انه فيه اشياء صعبه مره ولا مقادير مو بالسعوديه ولا شي زي كذا! ادري تحمست شوي بس شفت ان الحبه الوحده ب13 حسيت انه مره صعب يعني! بس عاد يوم شفت وصفتها ومقاديرها 

لقيتها سهله مره بس يبيلها دقه شوي عاد قعدت اشوف وصفات كثيره وكذا وقلت بسوي وحده عاديه وبحط معها الوان طعام ~*.*~ ,الزبده عاد سويتها وهي اني اخفق بياض البيض لين تصير فيه رغوه كذا , بعدين احط شوي سكر واخلطه مره ثانيه لين يصير زي الكريمه بعدين بزبديه ثانيه اخلط سكر بودره مع 

"almond flour"

هذا لوز مطحون طحن نااعم لين يصير شكله زي الطحين ,فيسمونه "طحين اللوز" او دقيق اللوز~ ,المهم اخلط هذا الطحين مع سكر بودره واخلطه مع بياض البيض بشوي شوي بعد ما اختلط كويس قسمته ثلاث اقسام اول قسم حطيت معه شوي نكهة التوت ولون احمر والقسم الثاني والثالث حطيت معه فانيلا والوان ,واحد ازرق والثاني اخضر بعدين عاد صبيتهم بالصينيه على شكل نقط ^^ وخليته يقعد له شوي يمكن عشرين دقيقه كذا ثمن دخلته الفرن , انا سويت صينيتين الاولى طلعتها بعد 12 دقيقه وشوي كذا , اما الثانيه مدري شفيني فهيت وطولت بالفرن وتحمرت شوووي من تحت بعدين "حشيتهم" اللي بالتوت حطيت مربى التوت والخضراء حطيت نوتيلا والزرقاء حطيت بودينق جاهزه شاريتها بالتشوكلت 

  

هي صراحه طلعت "مقرمشه" اكثر من انها لينه! وما طلعت زي المكرونز بالضبط بس زين مني اني سويتها صراحه توقعت انه بيطع شكلها مرره مخيس بس كويس انها طلعت كذا ,بس الوحيده اللي جايه مضبوطه الزرقا جايه كذا لينه وجميله وكل شي عاد ان شاء الله بسويها مره ثانيه واضبطها صح 

Apple and Berry Pie

DAAAY 25

 

اليوم كنت مشتهيه فطيرة تفاح عاد قعدت ادور وصفات للعجينه نفسها باليالله لقيت! كلهم يشترونها جاهزه وانا ودي اسويها بنفسي! عاد لقيت وصفه من عجوز يا حبيلها♥ هي سهله بس مشكلته انه تطول شوي,, اول حاجه اقطع زبده قطع صغيره وهي بارده وبزبديه احط طحين وشوي ملح وافرك الزبده بالطحين بيديني كذا بس اقطعها واخلطهم ببعض بعدين اصب عليه شوي مويه مثلجه "حاطه كاس فيه مويه بارده مع ثلج" لازم تصير بارده عشان تضبط بعدين بعد ما اعجنها تصير كذا تتفتت يعني مو عجينه صدقيه ^^ ,المهم لفيتها وحطيتها بالفريزر هو المفروض اني احطها بالثلاجه لمدة ساعه بس عاد انا كنت مستعجله فحطيتها بالفريزر لمدة تقريبا نص ساعه كذا عاد يوم طلعتها لقيتها ما زالت تفتت ومو متماسكه عاد زدتها شوي مويه وعجنتها من جديد لين صارت كويسه ومتماسكه وحطيتها بالفريزر مره ثانيه تقريبا عشرين دقيقه كذا ,عاد يوم طلعتها قسمتها اكثر من النص بشوي , واخذت النص الكبير وحطيتها بين ورقتين من ورق البارشمينت بايبر وصرت افردها وهي بين الورقتين عشان ما ودي اعجنها على الطاوله لانها تتلزق طبعا ولازم احط طحين وانا ما ابغا ازيدها طحين وتصير قاسيه المهم بعد ما فردتها على شكل دائره دخلتها الثلاجه واخذت النص الثاني "النص الصغير^^" و فردته بعد بنفس الطريقه ودخلته الثلاجه وطلعت الاولى وحطيتها بالصينيه اللي بزيين فيها الفطيره وفردتها وزينتها ورجعتها للثلاجه وبعدين طلعت الدائره الثانيه اللي سويتها وقطعتها زي الشرائح طويله ورجعتها للثلاجه مرتن اخرى عشان ما تتقطع وكذا,, الزبده قطعت تفاح بس قشرته اول , وانا عندي شوي من الفروزن بيريز يعني توت احمر واسود ومدري وشو الزبده توت مشكل يعني بس مجمده -.- وعندي بعد شوي فراوله مجمده عاد حطيتها مع التفاح بعدين خلطت بزبديه سكر بني وابيض وشوي طحين وقرفه وخلطتهم وحطيتهم على التفاح والتوت وكذا وقعدت اخلطهم كلهم مع بعض وحطيتهم الصينيه اللي حاطه فيها العجينه واخذت الشرايح وحطيتها فوق التفاح والفراوله وكذا ودخلتها الفرن درجة الحراره 200 وبعد ربع ساعه قللت الحراره لين 180 وخليتها تقريبا اربعين دقيقه كذا وطلعتها ^^ وخليتها تبرد

    

 طعمها كان جمميل جدن جدن جدن♥♥♥ مااااره عجبني طعمها *.*واكثر شي عجبني الكمنيشن بين التفاح والفراوله والاتوات وكذا يعني >>"جمع توت-.-" واختي بعد مرره عجبها وكذا  

Molten Lava Cake

DAAAAY 24

اليوم كنت مره مشتهيه شي زي السوفليه كذا ,عاد فيه وصفه من زمان وانا اقول ودي اسويها وهي شي بين الكيك وبين السوفليه اللي يشوفه يقول كيك بس من جوا كانه سوفليه اسمه

Molten Lava Cake

عاد قعدت ادور وصفه كويسه وكل وحده غير عن الثانيه -,-! ما لقيت ولا وصفتين متشابهات! عاد قلت بسوي اسهل وصفه اللي ما فيها خرابيط واجده وكيذا عاد سويته والطريقه هي اني اذوب تشوكلت مع زبده في حمام مائي او مدري شيسمونه بعدين بزبديه ثانيه اخلط صفار بيض مع سكر وشوي فانيلا لين يصير كريمي بعدين اصب عليه التشوكلت السايحه شوي شوي طبعا عشان ما تطبخ البيض ويصير فيه كتل وتصير حفله , الزبده بعد ما انخلط كويس وكذا , بالخلاط حطيت بياض البيض مع شوووي كريم اوف تارتار وبعد شوي حطيت شوي سكر >>يالييل اللشوي=)) الزبده طلع زي الكريمه بعدين صبيته على خليط التشوكلت وحطيته بالبوادي حقت السوفليه "ريميكنز" ودخلته الفرن بس قبل ما صبيت الخليط دهنتها بزبده وحطيت عليه شوي سكر عشان ما يلصق شي , المهم خليته بالفرن 15 دقيقه ويوم طلعته صار زي السوفليه بالضبط بس اسيل شوي> يعني سايل اكثر , المهم ما عجبني :\ دخلته الفرن مره ثانيه لمدة 10 دقايق ويوم ناظرته لقيته منفجر =))) مدري كيف انتفخ كذا وطلع من الجوانب والحاله صعبه=)) عاد يوم ذقت لي حبه طعمه بططل مره جاي كانه سوفليه بس مو سايل مره , عاد خليته يبرد شوي 

ويوم رجعت لقيت شككككله -__________- !!! يعني والله مدري شقول صراحه طلع منسم كذا وشكله مخخخخيس مره تكرم النعمه =)) بس والله طعمه بطل =)) اقسم بالله كل ما تذكرت شكله فقعت ضحك =)) ما ينفففع اصوره ابدددن فعشان كذا ما حطيت صوره اليوم معليش=))))) بس انقهرت صراحه يعني عجزت اسوي سوفليه زي الناس! ولا بعد المروض انه يطلع "مولتن لافا كيك" مو سوفليه وطلع الشكل الغريب ذا =)) الزبده عاد ان شاء الله بسوي وصفتن اخرى بعدين وبضبطه واصوره

( ︶︶ )

    

Blueberry & White Chocolate Chunk Scones

DAAAY 23

اليوم كنا معزومين وانا قمت متأخر من الزين :) ولا امداني اسوي شي فقلت مالي الا اني اسوي إذا رجعنا , عاد يوم رجعنا كانت عندي بعض الاغراض ناقصه! فرحنا نشتريها وكذا ومن هذي الاغراض شريت بلو بيري *.* او توت فقلت ابغا اسوي شي بالتوت الازرق الجميل هذا وقعدت ادور طبخات حلوه وكذا ولقيت شي جمييل جددن بين الكيك وبين الخبز وكذا وطريقته سهله جدن وهي اني اخلط طحين مع شوي بيكينق باودر وشوي ملح مع زبده تصير بارده "يعني مو لينه مره ولا جامده" وافركها بالطحين لين تصير فيه زي الكتل كذا, بعدين حطيت البلو بيري مع وايت تشوكلت تشيب *.* , عاد بزبديه ثانيه خلطت بيض مع حليب وصبيته على خليط الطحين و وصارت زي العجينه .. عاد الطريقه اللي قريتها غريبه صراحه انا ما فهمتها كويس .. تقول انه احط العجينه بصينيه عاديه "حقت الكوكيز" وافردها كذا شي بسيط بعدين اقطعها مستطيلات وابعد كل قطعه عن الثانيه وانا سويت كذا بس طلعت قطعه كككبيره وقطعه صغيره -.- عاد صرت اخذ شوي من ذي واحطها فذي وازيد وانقص وكذا لين صارو تقريبا متساويات ودخلتهم الفرن درجة حرارته 218 لمدة 20 دقيقه بس حسيت انها ما تحمرت ولا استوت كويس فزدتها 10 دقايق و لين تحمرت وصارت وش زيننها 

 

 

طعمه ججدن جميل بس احس انه ما فيه طعم قوي! وطبعا عجب اختي <.< انا احس انه لازم ازيده وايت تشوكلت وشوي سكر عشان يطلع ججججميل جدن بس هو طعمه الحين مره كويس يعني موب شين! يعني لو اني احب اشرب شاهي كان اكلته معه بس مع الاسف ما اطيق لا الشاهي ولا القهوه العربيه -___- ولاني سويته متاخر فمحد ذاقه من امي وابوي وكذا بس احس انه مره بيعجبهم لانهم يحبون اي شي فيه فاكهه!   ء  

Cream Puffs with Custard Filling

DAAAY 22

 

 

اليوم كنت مشتهيه شي بالكاسترد فقعدت ادور شي فيه كاسترد وكذا و جتني فكره اني اسوي "كريم بفس "هذا زي عجينة الاكلير إذا كنتوا تعرفونها "اللي كلها بيض -.-" انا صراحه ما احبها لان كلها بيض واحس ان طعم البيض يصير قوي فيها 

عاد قعدت ادور وصفات ما يصير فيها بيض كثير واخر شي لقيت وصفه ما فيها الا بيضتين ~*.*~ كل الوصفات اللي شفتها قبل فيه ست او سبع بيضات! المهم عاد الطريقه مره سهله , اول شي اغلي زبده مع شوي مويه على النار بعدين اطفي النار واحط طحين وشوي ملح وسكر وتصير زي العجينه وارجع احطها على النار مره ثانيه بس دقيقتين كذا لين تتماسك العجينه بعدين احط البيض , بس قبل ما احط البيض اخلي العجينه تبرد ما يصلح احط البيض والعجينه حاره ,بعدين اخلطها مع البيض لين تصير سايله بس طبعا موب سايله سايله يعني كذا ثقيله تشبه خليط الكيك بس اثقل! الزبده .. حطيت الخليط بكيسه بلاستك وقصيت الزاويه وصبيته بصينية الكوكيز على شكل دوائر ودهنتها بالبيض ودخلتها الفرن ربع ساعه وكانت درجة حرارة الفرن 200 بعدين قصرت الفرن ل180 وخليته تقريبا نص ساعه بعدين طفيت الفرن وخليت الصينيه جوا وعلى بال ما الصينيه بالفرن سويت الكاسترد ,, قبل كم يوم سويت كاسترد اللي دايمن امي تسويها سهله وطعمها حلو وكل شي بس لاحظت انها ما تنفع الا إذا كانت توها مصلحه "ناكلها بوقتها" لان بعدين تنشف وتصير مدري كيف قايله عاد قلت بسوي الكاسترد بالطريقه المعروفه وهي انه اغلي حليب على النار مع شوي فانيلا وعلى بال ما هو يغلي اخلط صفار بيض مع سكر ونشا وإذا غلا الحليب اصب شووي من الحليب على البيض وخلطه كويس وكل شوي ازيد الحليب لان لو صبيت الحليب على طول على البيض وهو حار بيطبخ البيض ويتكتل ويطلع خرابيط فلازم اصبه على شوي شوي وانا اخلطه زين المهم بعد ما ينخلطون كويس يطلع سايل ارجعهم على النار لين تثقل وتصير كاسترد بعدين اطلع اللي بالفرن واقسمها نصين واحط جواها الكاسترد..

 

   

طعمها كان كويس يعني مو مرره عجبني  ,طعمه عادي جدن توقعته احلى من كذا بس اختي عجبها مره

Chocolate Strawberry Crumb Bars

DAAAY 21

 اليوم كان مزاجي شوي مخيس وباليالله لقيت شي اسويه اليوم  .. عاد قلت بسوي شي سهل وكذا, وهو عباره عن ثلاث طبقات اول وحده زي الكوكيز بس طبعا ساده "اقصد بدون تشوكلت تشيب" والطبقه الثانيه تشوكلت والثالثه عاد قعدت اخمبق شوي اشياء من عندي المهم اول شي خلطت زبده مع سكر بني بعدين خلطت معه او "عجنت" معه طحين لين صارت زي العجينه اللينه كذا تتفتت , الزبده عاد اخذت ثلاث ارباعه ورصيته بالصينيه ودخلته الفرن 12 دقيقه وعلى بال ماهو بالفرن حميت بالمايكرويف حليب نستله المركز مع تشوكلت تشيب وصار سايل ثقيل كذا المهم بعد ما طلع من الفرن صبيت التشوكلت عليه و بعدين فوقه اخذت ربع العجينه الباقي ووزعته على التشوكلت وحطيت شوي وايت تشوكلت تشيبس ووشوي لوز عاد اخر شي حطيت مربى فراوله اخذ ملعقه صغيره و اوزعه عليه .. بعدين ادخله الفرن 25-30 دقيقه كذا بعدين خليته يبرد تقريبا ساعه عشان اقدر اقطعه وذا 

  

طعمه كان جدددن جميل خصوصا المربى معطيه طعم بطل واللوز بعد شي جميل وكذا   

Snickerdoodle Muffins

DAAAY TWENTY

اليوم كنا بنطلع بالليل كل العائله السعيدة^^ ,فقلت ابغى ادور شي سريع وبسيط ويصلح للطلعه وكذا عاد قلت بسوي مفن عااادي مره ساده من جوا ما فيه شي بس من برا فيه سكر وقرفه.. المهم اول شي اخلط الزبده مع السكر الابيض بعدين احط البيض مع الفانيلا بعدين نفس طريقة امس اني اجهز زبديتين وحده فيها طحين وبيكينق باودر وبيكينق صودا و كريم اوف تارتار ملح وشوي قرفه والثانيه احط فيها ساور كريم, ابششركم لقيييته بالدانوب ~*.*~ او ابشر نفسي؟ والله مدري من ابشر الزبده اني لقيته وانبسطت وكذا يعني, عاد انا شريت علبه وحده بس من الساور كريم.. لاني دايم ما احط الا ملعقتين او ثلاث بس لكن هالمره ابغا كوب وربع! فحطيت ساور كريم وكملت الباقي من زبادي اكتيفيا المخفوق الززبده عاد سويت نفس حركة امس اني احط شوي طحين وشوي زبادي او "ساور كريم" شوي طحين وشوي زبادي لين يصير زي العجينه بس المشكله ان الساور كريم اثقل شوي من زبادي اكتيفيا فصارت العجينه شوي سايله فزدته شوي طحين لين صارت العجينه كويسه .. عاد باستخدام ملعقة الايس كريم اخذ شوي من العجينه واحطها بصحن فيه سكر+قرفه بعدين احطه بصينية الكب كيك وادخلها الفرن عشرين دقيقه كذا وخليته يبرد~

صراحتن طعمه ما عجبني مره! لان ماله نكهه قويه! صاير كاني اكل خبز عادي وعليه شوي سكر وقرفه! ما فيه طعم قوي , احسن شي فيه انه لييين مره, بس عاد عجب اختي مرره لانها تحب تاكل الاشياء اللي مالها طعم :\ >> ابو الطفاااش -.- شكلي بتصفق:$  .. المهم انه موب مره شي جميل يعني عادي اكله بس ما فيه اي متعه وانا اكله -_____-      ء   

Coca Cola Cupcake

DAAAY NINETEEN 

 

 

اليوم سويت شي لي اسبوع ونص وانا بسويه كل يوم اقول بكرا كل يوم اقول بكرا بس عاد اليوم جزمت وسويته اخيرا ~*.*~ هو كب كيك وانا صراحتن ما احب الكب كيك الا بس الريد والبلو فيلفت بس عاد يوم شفت ذي الوصفه تحممممست مره اسويه لان اولا الكب كيك هذا محشي "اقصد فيه جواه شي" ياخي احس ما تنفع محشي الا مع محشي كوسه؟!! الزبده غير انه محشي وكذا انه بالكوكا كولا احس نكهه غريبه مره اول مره اشوف شي زي كذا! فقلت بسويه .. اول شي اجيب زبده لينه اخلطها مع سكر ابيض بعدين اخلط معاه بيض ,,وبعدين اجهز زبديتين وحده فيها طحين وملح وبيكنق صودا وكوكو باودر والزبديه الثانيه اخلط كولا مع فانيلا مع

"Butter Milk"

هذا سلمكم الله حليب ينباع بالسوبر ماركت اسمه بتر ملك بس عاد انا ما ادري إذا فيه هنا عندنا ولا لا! لاني ما قد دورت انا اسويه وهو سههل جدن ما يبيله شي! يعني مثلا لو احتجت كوب منه احط كوب حليب عادي بس احط عليه ملعقة خل! واخليه يقعد خمس دقايق ويطلع بتر ملك ^^ وهذا يساعد على انه يخلي الكب كيك لين وخفيف وبطل وكذا يعني المهم عاد بعد ما جهزت الزبديتين اصير اخلطهم مع خليط الزبده والسكر والبيض على شوي شوي يعني احط شوي طحين وشوي كولا لين يخلصون بعدين عاد اصبهم بصينية الكب كيك وادخله الفرن 20 دقيقه واطلع الكب كيكات^^ واخليهم لين يبردون بعدين اسوي زي الصوص كذا "قليز" وهو عباره عن سكر بودره مع شوي كولا لين يطلع ثقيل كذا يشبه الحليب المركز , وخليته على جنب وبديت اخذ كل حبة كب كيك واسوي زي الدائره او "الحفره" بالسكينه واكل اللي جوا ^^ الزبده الحفره هذي اصب فيها 

"Cherry Pie Filling"

كل حبة احط فيها حبتين كرز بعدين اصب عليها او "اشخمط" عليها شوي من القليز اللي سويتها ,بعد كذا اسوي كريمه عاديه واحطها فوق الكب كيك ..  *تراني فاشله جدن في تزيين الكب كيك* إذا صرت من عشاق الكب كيك ان شاء الله اتعلم

 

   

طعمها كان جمييييييل جدن خصصوصا الكرز اللي جوا مخلي طعمها بططل والله♥ و

ماهي حاليه مره  ,والكريمه جميله ما توجع التسبد زي باقي الكب كيكات >< انا صراحه احب الكب كيك اللي تصير الكريمه حقته خفيفه بس الكيك نفسه دسم شووي احسن من انه يصير العكس الكيك خفيييف كنه هواء والكريمه كني اكل زبده!! يووه والله اسفه احس اني كرهتكم بام الكب كيك خلاص طيب الكب كيك من اجمل الاشياء بالحياةة ♥____♥ >> سلكو لي اوكي؟     

Snickers Cookies

DAAAY EIGHTEEN

اليوم صراحه كان مررره مالي خخلق اسوي شي ابددن ,نص اليوم كنت نايمه -.- نظامي مخيس والله لازم اصلحه -.- ,الزبده عاد كنت مشتهيه سنكرز كوكيز كنت شايفه الوصفه من زمان بس كل ما ذا اهون لانه ياخذ شوي وقت المهم عاد سويته سهل جدا وهو اني اخلط زبده مع سكر ابيض وبني وبينت بتر بعدين احط البيض والفااااااااااااااانيلاااااا ~~*.*~~ لقيييته ببببنده والله شعور يجيب السسعاااده صراححتن قعدت انطط شوي شوي شكلي غبي :) احس اللي جنبي يناظروني كذا >.> بس ما عليه خن اعبر عن فرحححتي ياخخي ~*.*~ اوكي 

#ignoreThis

بعد ما خلطت معه البيض والفانيلا حطيت معه الطحين والملح والبكينق صودا وشوواي قرفه بس ,لاني احب طعمه مع البينت بتر وكذا الزبده ,قعدت اعجن لين اختفى الطحين وبعد كذا غلفت العجينه ببلاسك ودخلته الثلاجه ثلاث ساعات بعدين قطعت السنيكرز وطلعت العجينه من الثلاجه وقسمتها "فيه شي ودي اقوله عن التقطيع وكذا إذا بغيتوا تقطعون شي وتبونه كله يطلع متسواي اقطعوه من النص والنص اقطعو نص مره ثانيه بعدين نص النص اقطعوه نص مرتن اخرى وهكذا ... يارب انكم فهمتو يارب المهم عاد صرت اخذ قطعه من العجين واحط جواه حبة سنكرز واكورها واحطها بالصينيه بعدين حطيت الصينيه بالفريزر شوي بس يعني يمكن ربع ساعه كذا عشان يطلع شكلها مرتب لين دخلتها الفرن مو يطلع زي الكاو بوي هات =))) الزبده عاد دخلتها الفرن لمدة تقريا 17 دقيقه كذا بعدين طلعتها وخليتها تبرد شوي وسيحت تشوكلت "كسيس" بالمايكرويف وشخمطت على كل حبه ^^ 

طعمه والله ججاممممد♥ ومو حالي ولا شي حلاوته كويسه مره وطعمه بطل

Fruity Pavlova ~

DAAAY SEVENTEEN

اليوم سويت شي قد تكلمت فيه من قبل وحطيت الرابط حق الفيديو اللي هو 

"Pavlova"

هذا يشبه الميرانقو اللي امس تكلمت عنه , مرره بسيط وسهل ويجيب السعاده وكذا وهو عباره عن بياض البيض اخلطه لين تطلع شوي فقاعات كذا بعدين احط "كريم اوف تارتار" بعد كذا ابدا احط السكر على ملعقه ملعقه لين يخلص السكر واطفي الخلاط واحط شوي نشاء وفانيلا يطلع مثل الكريمه الثقيله ,بعدين حطيته بالصينيه على شكل دائره كبيره ودخلته الفرن ,, هنا لازم يدخل الفرن 50 دقيقه بالضضبط ,بس من التننناحه الزايده فيني اليوم نسيت اشغل التايمر الا بعد شوي قسم بالله ارتفع ضغطي!! يعني ما قد نسيت احط التايمر بس يوم صار شي مررره مهم الحين نسيته -.- عاد حطيت رقم من عندي صراحه ,, الزبده بعد ما خلص الوقت اللي من مخي طفيت الفرن بس خليت الصينيه جوا الفرن و فتحته فتحه بسيطه وخليته يقعد يمكن ساعتين او ثلاث ,, وقعدت اجهز الكريمه وهي عباره عن كريمة الخفق مع سكر بودره اخلطه او "اخفقه" لين تصير كريمه وبعدين سويت زي الصوص حطيت فراوله مجمده مع شووي مويه بالخلاط وخلطته لين صار سايل وحطيته على النار وعصرت عليه برتقاله وخليته لين بدت تطلع فقاعات صغيره بس ,وطفيت النار صراحه ..طعم الصوص ذا ججااممد والله *.* ♥♥ .. الزبده عاد قعدت اقطع خوخ ♥♥♥♥♥♥, وحطيت معه كرز بعد ما طلعت الشي اللي جوا ذا مدري شسمه -.- الزبده عاد طلعت الصينيه من الفرن وحطيت فوقه الويب كريم اللي سويته بعدين فوقه الفواكه وصبيت عليه الصوص الجميل حق الفراوله  

طعمه صراحه كان غريب مره ! بس بطططل ♥♥ يعني مدري كيف جاي كانه كيك على كريمه على مارشملو على ذاك حلاو قطن مدري شعر البنات مدري شسمه ذا الزبده انه غريب وجميل بنفس الوقت , بس مشكلته انه صار ححالي مره لاني انا كنت اتخيل ان هذا الشي اللي تحت "البافالوفا" ما راح يصير حالي! تخيلته بيطلع كذا مافيه طعم قوي فكثرت سكر بودره بالكريمه بس عاد طلعت حاليه وانا زدتها حلاوه بس ماعليه هو "حلا" بالاخير ولا لا؟ 

Cookies with Meringue On Top ~

DAAAAY SIXTEEN

اليوم فيه عزيمه بعد :) بس موب ببيتنا , والله اني ما احب العزايم والعروس ياخخي قلق قسم بالله =( الزبده اني ما رحت والمشكككله الاكبر ان شغالتنا راححت :) ان شاء الله ترجع بكرا الموهيييم ما علينا  ,سويت شي جدددن جمميل وهو عباره عن طبقة كوكيز تحت وفوق طبقة مارينقو ,, اول شي سويت الكوكيز طبعا زبده لينه مع سكر ابيض وبني وبعدين حطيت صفار بيض وبعد ما اختلط كويس حطيت الفانيلا وملعقة مويه بعدين بديت احط الطحين "طبعا الطحين خالطه معه بكينق باودر وبكينق صودا وملح" واعجنهم مع بعض بعدين اخذ العجينه وازينها بالصينيه واخليها متساويه بكل الاماكن بعدين عاد اسوي المرانقو *.* اخذ بياض البيض و اخلطه بالخلاط او "المكسر" لين تطلع فيه فقاعات كذا , بعدين ابدا احط على شوي شوي سكر بني لين صار كريمه عاد الوصفه ما فيها "كريم اوف تارتر" بس انا حطيت شوااااااي مره معه بس عشان يضبط وكذا يعني الزبده قبل ما سويت الميرانقو حطيت تشوكلت تشيب فوق العجينه وبعد ما سويت الميرانقو حطيته فوق التشوكلت تشيب و وزعته وبعد كذا قصيت ورق البارشمينت بيبر وحطيته فوق الكريمه او الميرانقو ودخلته الفرن لمدة عشرين دقيقه "حطيت الورقه عشان ابي الكوكيز اللي تحت يستوي بدون ما ييبس ويحترق الميرانقو , بعد عشرين دقيقه طلعت الصينيه وشلت الورقه ودخلته الفرن مرتن اخرى لمدة تققريبا 6-8 دقايق كذا وطلعت الصينيه وخليته يبرد على بال ما اغسل المواعين :’) بعدين قطعته وكان الكوكيز لين ومستوي زين وجمممميل والميرانقو معطيه طعم بطططل والله  

 

وذا وشسمه ودي اقول شي :$ ترا كل الصور اللي ماش موب مره زينه يصير طعمها جاممد!! لاننا نصير نصور بسرعه بس نبي نبلعه =)) نصور صوره وناكل حبه كل شوي نصور وناكل =)))  المهم كلهم ذاقوه وعجبهم مرره وكذا

Cherry Custard Tartlets

DAAAAY FIFTEEN 

اليوم كان عندنا عزيمه ببتينا فقلت لازم اسوي شي قد سويته من قبل وحلو طعمه وكذا بس من شروط التحدي انه ما اعيد الحلا مرتين! الا إذا كان خربان ولا بعدل فيه شي عاد قالت اختي سوي مفن انا كنت مسويته من زمان "بس موب بالتحدي" مفن بالقرفه انا صراحه ما كان لي خلق اسويه يعني مدري كيف ما كنت مشتهيته وغير كذا ودي اسوي شي جديد بس المشكله اخاف ما يطلع زين واتوهق 

لان الحلا اللي بسويه بنحطه للضيوف,الزبده اني سويته بقوله باختصار هو فيه زي الحشوه عباره عن قرفه وسكر بني وشوي زبده لينه وشوي مويه وفيه بعد "توبينق" الشي اللي ينحط فوق المفن زي المفن اللي قد سويته

  وهو عباره عن "شوفان" وسكر بني وقرفه وزبده لينه المهممم ما علينا من ذا المفن انا سويته و حطيته مع القهوه

 ولا امداني اصوره ولا شي وانا اصلن ما خش مزاجي -.- مدري كيف ما ودي يصير هو "حلا اليوم" يعني المهم بعد ما راحو الضيوف وكذا قلت بسوي شي سريع وما يبيله شي وكان الوقت متأخر الساعه كانت 2 ونص الظاهر المهم عاد قلت بسويه وهو زي البسكوت جواه كاسترد *.* او محلبيه على قولة جدتي =)) بس الظاهر ان ال"محلبيه" غير شوي عن الكاسترد ^^ المهم ومن فوق احط 

"Cherry Pie Filling"

 الزبده الكاسترد قريت طريقته حواقيين كثيره وبيض وحليب وحاله بس امي دايم تسوي كاسترد بططل بس بطريقتن اخرى ,, فيه بودره حقت كاسترد هذي احطها مع حليب بودره وسكر ومويه واحركها عالنار لين تصير ثقيله وجميله تجيب السعاده وكذا الزبده عاد شلتها من النار وصبيتها بباديه او زبديه كبيره و غطيتها بورق بلاستك

او مشمع او نايلون ياخي والله مادري وش يتسمى هذا الشي الزبده انه 

  -.-"plastic wrap"  

المهممم فيه شي مهم جدن بالكاسترد انه اذا بتستعملونها بشي وتبون تحطونها بالثلاجه لازم تخلون ورق البلاستك لاصق بالكاسترد ولا بيجمد بعدين ما ينفع تسوون فيها اي شي,المهم عاد حطيت الكاسترد بالثلاجه وبديت اسوي العجينه حقت البسكوت او الشي اللي تحت وهي ماااره بسيطه بس زبده "لينه" وطحين وشوي سكر اعجنهم مع بعض كويس واحطهم بصينية الكب كيك الصغار ذوليك ,الزبده اني عفففنت وانا احطهم بالصينيه وانكسر ظهري -.-  ,المهم دخلته بالفرن الجميل لمدة عشر دقايق لين تحمرت شوي .. يوم طلعته على طول قعدت انقزهم من الصينيه ويوم تكسرت :| والله جتني الصيحه انقهرت قلت بعد كل ذا التعب وانكسر ظهري وحالتي حاله اخر شي تتكسر وتتفتت؟ غش والله :( المهم قعدت انقزهم وانا اتحلطم يوم قلت بخليها شوي تبرد يمكن تزين , عاد يوم خليتها شووي بس يمكن دقيقه! ويوم حاولت اشيلها طلعت على طول ~*.*~سعااده صراحه =)) التعب اللي تعبته ما راح هباءً منثوراً <<ما كأني تحمست شوي :\ ؟ اوكي ما علينا.. بعد ما طلعتهم كلهم طلعت الكاسترد من الثلاجه وحطيته بكيس بلاستك وقصيت زاويته بس فتحه صغيره وقعدت اصبب جوا كل حبه بعدين اخذت هذاك الشي حق الكرز وحطيته فوقه

وطعمه جمييل جميييل جمييييل ~*.*~ والله بلعت ثلاثه بدون ما احس *.* >اقول اها بس -.-,المهم اني خقيت عليه وامي خقت عليه واختي بعد 

وكل العائله الكريمه ^^  >> نصابه اصلن كلهم نايمين -.- الزبده مدري شفيني اليوم قمت احشش! بروح انام بس

Snickrs Stuffed Cookie Cups ♥

DAAAAY FOURTEEN 

 اليوم كنت ناويه اسوي شي زي التشيز كيك بس حبات صغيره كذا , احس طعمها ججامد *.* بس يوم جيت بسويه لقيت البيض ما فيه الا حبتين! وانا كنت احتاج 3 :) يعني ناقصني بس بيضضضه وحده!! اف شي يقهر والله -.- والمشكله ما عنددي احد فاضي لي ابددن فقلت خلاص بس بدور شي ثاني يحتاج بيضتين بس ولقيت شي اسمه

"Cookie Cups"

هذا الشي يشبه الكب كيك بس انه محشي كوسه! >امزززح -.- محشي تشوكلت, صراحه شكله شوي غريب بس قلت بسويه ..الزبده ,سويت نفس اللي مكتوب بالضبط لان شكله غريب وكذا فقلت لازم اسوي كل شي مكتوب ستيب باي ستيب ^^ المهم الطريقه هي اني اخلط زبده سايحه مع سكر بني وابيض بعدين البيض والفانيلا بعدين الطحين والبيكنق صودا والملح وخلطتهم كويس بعدين حطيتهم بالصينيه وقطعت سنكرز *.* ♥♥ وحطيت حبه على كل وحده بعدين صبيت الخليط عليه مره ثانيه فوقه ودخلته الفرن وعلى بال ماهو بالفرن سويت شي ينحط فوقه زي الكريمه بس هو مو كريمه شيءٌ اخر وهو عباره عن تشوكلت مذوب بس انا حطيت نوتيلا مع شووي بينت بتر وحطيتهم بالمايكرويف شوي عشان اقدر اخلطهم كويس بعدين عاد خلطت معه شوي زبده لينه وشوي "شراب الذره" وشوي فانيلا وسكر بودره مع شوي حليب وخلطتهم بالخلاط اليدوي وخليته على جنب,, بعد ما خلص اللي بالفرن وتحمر شوي طلعته وكان منتفخ شوي بس بعدين نسم -.- وصار فيه حفره من الوسط! عاد قلت كويس اصب الشي اللي سويته جوا الحفره ذي =))<<كم مره قلت شوي؟ احس اني زودتها شوي =)) المهم هذي صورته حطيت عليه بسكوت من فوق بس شكل ~.. وطعمه بعد جميل شوي> خلاص والله زودتيها عاد

صراحه طعمه كان بطططططل والله مره مره جميل♥♥ بس كان فيه مشكله! انا احس ان الطريقه اللي قريتها فيها اخطاء بس قلت ما راح اعدل شي اخاف تخرب بس شكلي بسويه مره ثانيه بطريقتي انا عشان يطلع احسن ويطلع مضبوط .. واحس لو احط الزبده لينه احسن من ما تكون سايحه وما راح احط ورق حق الكب كيك لانه لصق فيه يعني مدري كيف جاي لو اني ما حطيت الورق احسن :\ 

Marshmallow Crispy Bars ~

DAAAAY THIRTEEN

امس كنا متفقين انا واختي اننا نقوم بدري واسوي الحلا واخلصه ونصوره وكذا لان نومنا صاير مخييس اخيس شي و غير كذا وقت المغرب ذا مانيب ادانييييييه -____- استغفر الله بس(˘ ˘),  الزبده اني سحبت على خطه عين سين صاد حقتنا =)) >لا تسألوني وشي ذي لاني ما ادري =)) الزبده عاد قمت متأخر كالعاده -.- وقررت اني اسوي شي يصير يعني غيرشوي عن الكوكيز والبراوني والمفن وكذا

 فسويت هذا الشي الصدز اني ماادري وش اسمه :$ المهم ,وهو اني اخلط زبده مع سكر ابيض بس انا حطيت معه شوي سكر بني بس يطعم فيه شوي بعدين البيض والفانيلا وبعدين الطحين والملح والبيكنق باودر والكوكو باودر ولمن ينخلطون كويس اصبه بالصينيه وادخله الفرن لمدة ربع ساعه 

بعدين بعد ما اطلعه على طول وهو حار احط عليه مارشملو وادخله الفرن مرتن اخرى لمدة تقريبا 3-4 دقايق كذا وعلى بال ما هو بالفرن اصير انا مذوبه تشوكلت مع بينت بتر بالمايكرويف وبعد ما ينخلطون زين احط معه كورن فليكس اسمه

"choco bits"  

هذا صراحه مره مخيس بالنسبه "لكورن فليكس" بس ممكن نسوي فيه حلويات جميله جدن ,الزبده حطيت شوي من هذا الكورن فليكس مع التشوكلت والبينت بتر عشان يطلع مقرمش وكيذا يعني ,وبعد ما طلعت الصينيه من الفرن على طول صبيت عليه هذا الشي اللي سويته "التشوكلت والبينت بتر" ودخلته الثلاجه يمكن اقل من نص ساعه .. عاد حطينا القهوه, فقطعت شوي منه وحطته عالقهوه وكان توه ما برد مره وصراحه يوم اكلته ما عجبني مره احس ناقصه شي يعني لو احط مثلا طبقة بسكوت فوق المارشمالو بيطلع احسن لان كله جاي لين! ومافيه شي قاسي او مقرمش الا الكورن فليكس اللي حطيته فوق , بس قلت يمكن المشكله لاني ما خليته يبرد "تماما" يعني فتحمست شوي وحطيته بالفريزر (˘   ˘) .. يمكن قعد ساعتين او ثلاث وطلعته ويوم ذقته طلع بططل *.* صار كذا يعني قاسي شوي ومضبوط *.* الزبده هذي صورته

عاد ذا وشسمه ودي اقول شي وكذا يعني .. اللي عنده اقتراحات لحلويات وكذا يقولي لاني اتعب وانا ادور شي اسويه واقعد اعصر مخي وحالتي حاله فإذا عندكم شي ولا شي يعني قولولي  

Cowboy hat Cookie :p and Oreo Cookies ~

DAAAAY TWELVE

اليوم صراحه قمت متأخر وكنت مدري وش اسوي ماكنت مشتهيه شي وكل ما لقيت وصفه كويسه وكل ما لقيت شي يصير فيه شي مخلص عندنا فقلت بروح السوبر ماركت واشتري الاشياء الناقصه وكذا بعدين باسوي كوكيز محشي بالاوريو انا صراحه ما احب اكل الاوريو الا إذا كان مطحون ولا شي بس قلت بسويه وبشوف وش يطلع طعمه  , بس ما راح اسويه كله كذا! قلت بقسم العجينه قسمين واسوي نص محشيه بالاوريو والنص الثانيه من مخي الجميل .. إليكم الطريقه ( ︶ ︶ ) ..اول شي كالعاده زبده لينه مع سكر بني وابيض واخلطهم كويس بعدين احط البيض والفانيلا بعدين الطحين والبيكنق صودا والملح ثمن عاد حطيت شوي تشوكلت تشيب وعجنتها كويس بعدين آخذها بملعقة الايس كريم العاديه واقسمها نصين واحط حبة اوريو بينها واخليها زي الكوره بعدين عاد ادخله الفرن .. بس صار شي غبي شوي هي المفروض انها تطلع على شكل كوره بس انا حقتي طلع شكلها طاقية كاو بوي! >>مدري ليش تخيلتها كذا , "هذا سبب التسميه =))" الزبده ان شكلها يضحك صراحه بس طعمها بططل الاوريو طعمه حلو ولين ما يوجع الاسنان! >انا اذا اكلته اوجعتني اسناني مدري ليه المهم ان طعمها جميل 

عاد انا قلت ان نص العجينه الثاني بسوي فيها شي من مخي فقلت باخذ الاوريو وحطيته بكيسه بلاستك ذوليك اللي يتصكرون من فوق بزي السحاب المهم حطيت الاوريو بالكيسه وقعدت اكسرهم بس تكسير خفيف يعني تصير فيه قطع كبيره وصغيره بس مو زي البودره! المهم وخلطتها مع العجينه وحطيتها بالصينيه يعني كوكيز عادي بس بقطع اوريو وكذا وطلع طعمه اطلق من اللي قبل ( ︶ ︶ )  يعني عشاني انا اللي مخترعته وكذا يعني =)) 

طبعا انا الحين قاعده اكتب وانا متلحفه وشكلي غبي لان المكيف يصقع بخشتي وخشمي احمر وحالتي حاله هههه بس والله اهون من ذا الحر اللهم يا تسافي,, الزببده اخواني خققو عالكوكيز مرره عجبهم وكذا بس امي وابوي الجميلين ما ذاقوه للحين لاني سويته متأخر مره كله من اختي ما قومتني الله يصلحهها..>امززح وشو يعني الواحد ما يمزح؟ الزبده اكيد بيعجبهم لان طعمه بططل صراحه لين ووش زيينهه  

( ︶ ︶ )

Chocolate Souffle ~

DAAAAY ELEVEN

اليوم من قمت وانا مشتهيه سوفليه *.* عاد تحمست اني اسويه لاني قبل كنت اسوي سوفليه خربوطي شوي كنت ماخذه الوصفه من كتاب النخبه -.- ومره تضبط وعشر مرات لا :\

 فقلت بدور وصفه كويسه و غير عن اللي كنت اسويها عاد يوم قعدت ابحث وكذا اكتشفت ان الطريقه اللي كنت اسويها غيييييير مره >< كنت اسيح زبده عالنار مع طحين وسكر بعدين احط كوب ونص حليب بودره وكوب ونص نسكويك ومويه واخلطهم مع بعض واصبه عليه وبعدين اخلط بيضه مع بيكنق باودر وفانيلا واصبه عليه بعد وبعدين ادخله الفرن ثلث ساعه وكل مره يطلع زي الكيك النااشف ولا يطلع سايل مره ...

 بس الطرق اللي شفتها ولا وحده صارت زي كذا:\ المهم 

بقولكم الطريقه .. اول شي احط عالنار حليب مع سكر وعلى بال ما هو عالنار اخلط صفار بيض مع شوي طحين وسكر ,ولامن غلى الحليب صبيته على خليط صفار البيض اصبه شوي شوي لمين يختلط مع بعض كويس بعدين احطه كله عالنار مرتن اخرى لمدة 40 ثانيه او لين يبدا يثقل شوي

 بعدين اطفيه وعلى طوول احط نص كوب تشوكلت " قطعه من لوح تشوكلت عادي بس مقطعته قطع صغيرة" الزبده 

احط هذي التشوكلت مع خليط صفار البيض والحليب واحركه لين يميع او يموع التشوكلت :$ بعدين احط شوي من الكوكو باودر واحركه كويس

 بعدين عاد بالخلاط او ال

 "MIXER"

احط بياض البيض مع شوي من 

"CREAM OF TARTAR"

واخليه يخلطه شوي بعدين احط ملعقتين بس سكر واخلطه لميين ينتفخ يطلع شكله زي الكريمه شكلها يوسع الصدر *.*

 الزبده, بعدين اخذ شوي من الكريمه "هي مو كريمه بس بسميها كريمه عاد" المهم اخذت شوي من الكريمه وحطيتها على الخليط اللي سويته قبل , بس احركه بشوووي شوي عشان ما تروح الانتفاشه حقت الكريمه او ما ينسم يعني الزبده اقعد احط على شوي شوي لين تنخلط الكريمه ثمن اصبها بالقوالب مدري البوادي مدري شسمها ذي حقت السوفليه البيضا ,وادخلهم الفرن انا كنت حاطه درجة الحراره  200 وبعد 10 دقايق غيرت درجة الحراره وحطيتها 180 واحط الوقت 20 دقيقه بعدين عاد طلعته على طول ورشيت عليه السكر المطحون وهازي صورته الجميله

   

عاد انا قبل ما اصب الخليط كنت مسويه حركه اكتشفت انها بايخه :)! انا قريت الطريقه ومكتوب انه اقص ورق الراشمينت بيبر واحطه حوالين الباديه واصب السوفليه بالوسط انا صراحه ما فهمت الحكمه منها بس سويت كذا قلت بشوف وش بيصير وطلع شكلها غبي شوي المهم طعمها كان جيد جدن بس انا تخيلته احسن من كذا توقعت انه بيصير زي الكريمي من الوسط بس صار كله زي الكيك! هو ححلو طعمه مره بس بالنسبه لسوفليه احسه انه موب مره زين يعني مدري كيف يقهر -.- شكلي بسويه مره ثانيه وبشوف اغير شوي بالطريقه وذا عشان يضبط ويطلع الي اللي براسي الزبده احس اني قرقت واجد اليوم بس وش اسوي عاد الخطوات كثيره شوي^^ 

Cherry Muffins

DAAAAY TEN

اليوم قعدت سنه وست شهور عشان ادور شي اسويه طفشت من الاشياء اللي فيها تشوكلت وبينت بتر و كذا فقلت ابي اسوي شي شوي شاطح ,شي زي بالفواكه يعني و كذا .. وابوي كان جايب انواع فواكه وذا وكان جايب كرز 

 والكرز كان مرره جميل صراحه كذا كبار ومتفخات وطعمها جميل وكل ابو شي .. الزبده عاد بسوي "مفن بالكرز" ولقيت وصفه لمفن بالكرز بس حسيت انه لو سويته بيطلع هواء! "يعني ما فيه نكهه قويه" فقلت لازم ازيد اشياء من مخي الجميل واخمبق شوي ^^ .. الوصفه هي اني اخلط الزبده مع السكر البني بعدين البيض والفانيلا وبعدين الطحين والبكينق صودا والملح وعاد حطيت انا شوي قرفه :$ المهم بعد ما انخلطو وكذا, حطيتهم بصينية الكب كيك .. عاد هنا الوصفه الصدقيه اللي اخذت منها الطريتزه <الطريقه -.- هي انه احط فوق الخليط اللي صبيته بالصينيه كرز طازج ..اشيل الشي اللي جوا العبس مدري البذور مدري وش تسمونه ,الزبده اشيله بهذيك حقت "الزيتون" < يارب انكم فهمتون .. المهههم الوصفه الصدقيه اني احط الكرز طازج على الخليط وادخله الفرن بس انا كنت خايفه انه ما يطلع له طعم قوي او نكهه قويه وكذا فأخذت الكرز بعد ما شلت العبس منه او "البذور -.-" وحطيته بالمقلاة مع شوي زبده وحركته على النار شوي بعدين بعد ما طفيت النار خليته يبرد شوي ثمن حطيت عليه بس شوي سكر بودره وسكر بني وحطيت نتفة قرفه بس , بعدين حطيته فوق الشسمه ذاك "الخليط اللي بالصينيه" ودخلته الفرن لمدة 25 دقيقه تقريبا وطلعته وخليته يبرد شوي وصورته ^^ عاد هذي صورته الجميله

 

الطعم كان مره بططل صراحه خصوصا انه مو حالي مره فعادي تاكل عشر ورا بعض ما يوجعك بطنك ولا شي =)) الزبده انه عجب امي *.* وعجب ابوي بس اخواني الصغار يقولون فيه طعم فقس بالاخير -.-  يعني بعد ما يبلعونه يطلع لهم ذا الطعم الله يحوم تسبدهم بس والله ان طعمه حلو بس هم ما يعجبهم الا اشياء فيها تشوكلت ولا بينت بتر =)) المهم وشفنا اربس قوت تالانت والحممدلله فازوا خواطر الظلااام ~*.*~ سعاااده صراحه احسهم يستاهلون ابناء بلدي *.* >> الحين وش دخلني بذا السالفه؟ مدري والله الزبده الظاهر اني بديت احشش شوي خلاص والله بروح انام =)) ههه 

Peanut Butter Brownie

DAAAAY NINE (˘ ˘)

 

 

 

 اليوم كنا معزومين باليل وكنت قاعده ادور شي اسويه وكذا بس عجزت القا شي ينفع! فقلت باخترع شي من مخي الجميل ~*.*~ فاخترعت براوني بس بالبينت بتر ادري ابلشت امكم في بذا البينت بتر بس وش اسوي عاد احبه ياخي (˘ ˘)  اخذت المقادير من وصفة براوني عاديه وبعدين حطيت خمبقتي اللي من مخي الجميل ^^ المهم .. خلطت زبده لينه او "بحرارة الغرفه" مع سكر بني وابيض بعدين حطيت معه "زبادي اكتيفيا المخفوق" اللي قلت عنه في تدوينه سابقه انه زي الساور كريم بس بما انه ما فيه هذا المخلوق بالسعوديه صرت احط هذا الزبادي ويسوي نفس المفعول المهم عاد خلطت معه ملعقة بينت بتر وخلطتهم مع بعض بعدين حطيت البيض والفانيلا بعدين حطيت الطحين والبكينق باودر والملح وبعد ما انخلطو كويس "ما طولت بالتحريك عشان ما يطلع ناشف وكذا يعني", بعدين حطيت وايت تشوكلت تشيب ومع بينت بتر تشيب *.* ثمن عاد حطيته بصينيه ودخلته الفرن لمدة تققريبا نص ساعه لين تحمر وطلعته

 

 

عاد الطعم انا ماااررره خقيت على طعمه صراحتن كان لين وريحته جججميله خصوصاً ان طعم البينت بتر والتشوكلت مره كان قوي .. لأني صراحه احب النكهات القويه *.* احس اني قاعده اكل شي صدقي مب هواء :\ ! المهم اختي قالت انه حلو وكذا بس لو معه بسكوت او شي يكون شوي قاسي احطه معه ,لانه كله جاي لين وذا .. فقلت ودي اسويه مره ثانيه واحط معه البسكوت هذا "قراهام كراكرز" احسه بيضبط معه وبيطلع بططل ,بس بسويه في يومن اخر ان شاء الله 

(˘       ˘)   

Chocolate Cookie with Peanut Butter Felling

DAAAAY EIGHT

اوكي انا قلت امس اني بسوي شي بالاوريو والبينت بتر بس عاد هونت منيب مسويته :$ بسوي شي بالبينت بتر بس ثاني بدون اوريو هو كوكيز محشو بالبينت بتر او ممكن يكون اقرب للبسكوت :\ هو صراحه شي يوسع الصدر لانه عجين وكذا والعجين من الاشياء اللي تجيب السعاده ~*.*~ الزبده.. هو عباره عن عجينة كوكيز عاديه ~.. زبده لينه مع السكر الابيض و البني بعدين بعد ما ينخلطون احط البيض والفانيلا وبعد كذا احط خليط الطحين بس معه كوكو باودر كثير يعني تقريبا نص كوب كذا .. بس فيه شي نسيت اقوله اللي هو البينت بتر حطيت ربع كوب مع الزبده والسكر قبل ما احط الطحين المهم بعد ما ينخلطون يصيرعجين خلاص هذا عجينة الكوكيز او البسكوت نفسه .. اما الحشوه فهي مره سهله وطعمها جناااااااان > امزح والله! , المُهييم هي عباره عن بينت بتر مع سكر بودره ! وبعدين اسوي كوره واقسمها نصين واحشيها واكورها من جديد و احطها بالسكر وبعد كذا ادخلها الفرن .. عاد هنا انا قمت اخبص شوي يعني انا قريت انه المفروض احطها بس 7-9 دقايق! وانا احسها مرره شوي يعني خير كوكيز يقعد بس سبع دقايق!! فقلت بخليها زياده لين احس انها خلصت وخليتها تققريبا 18 دقيقه و يوم طلعتها كانت مره كويسه بس بعد ما قعد شوي برا صار يابس بس يابس شي بسيط يعني .. صراحه يباسته كانت حلوه يعني بالضبط زي البساكيت والاشياء هذي يعني مو انها يابسه ما تنوكل! بالعكس طعمها مره بططل صراحه بس انا وانا كنت اسويها جاي على بالي انها تصير مرره لينه فعشان كذا حسيت انها يابسه يعني ..,المهم عاد هذي صورته الجميله ^^  

   

ودي اسويه مره ثانيه صراحه فيه اشياء صغيره ودي اعدلها فيه :\ ان شاء الله يومن اخر

Graham Crackers Muffins

DAAAY SEVEN

 

 

 

اليوم كنت ناويه اسوي حلا فيه بينت بتر واوريو واشياء كذا جميله بس مشكلته انه يطول! يعني لازم يقعد شوي بالفرن وشوي بالفريزر وشوي بالثلاجه وحاله وانا اليوم كنت قايمه متأخر وبالليل بنطلع! فقلت ما يمدي لازم اسوي شي سريع فسويت مفن "عشقي ♥" ياخي لو ان المفن شخص لتزوجته! الزبده بلا كلام فاضي :| .. سويت مفن ببسكوت "قراهام كراكرز" الزبده خلطت الطحين مع البيكينق باودر مع شوي ملح مع كوب من البسكوت هذاك" المهم وبعدين خلطت بالخلاط البيض مع الحليب مع الزيت مع السكر بعدين شوي شوي حطيت خليط الطحين هذا وصار ثقيل كذا ثمن عاد حطيت التشوكلت تشيب وحطيته بالصينيه حقت الكب كيك وبعد كذا سويت "توبينق" هذي تنحط فوق المفن .. هذي من الاشياء اللي تخلي المفن فائق الجمال >> متعوب عالكلمه الزبده وهي عباره عن البسكوت هذا مطحون مع سكر بني مع طحين مع قرفه و كم ملعقه زبده سايحه وبعدين اخلطهم كل ابوهم مع بعض واحطه فوق المفن وبعدين عاد ادخله الفرن لمدة كذا ربع ساعه تقريبا 

طعمه كان مره جميل خخخصوصا اللي فوق كان معطيه طعم مرره بططل ♥♥وكلهم مدحوه وكذا عاد ان ششا الله بكرا اسوي هذا الشي اللي فيه اوريو وبينت بتر هو صح راعي طويله بس احس ان طعمه يستاهل *.* .. وايه فيه شي ودي اقوله اللي هو التشوكلت تشيب قبل ما تحطونه مع الخليط خذو ملعقه من الطحين و اخلطوه معه بعدين عاد حطوه مع الخليط حق المفن .. هذا يساعد على انه ما تصير التشوكلت تشيب متكومات باخر المفن من تحت إذا دخلتوه الفرن .. ويصير متوزع كويس من فوق ومن تحت مو بس من جهه وحده! 

Marshmallow White Chocolate Bars

DAAAY SIX 

اليوم كنت ناويه اروح اشتري البسكوت اللي قلته امس اللي هو 

"Graham Crackers"

عاد رحت انا واختي وقعدنا ندوور ونحوس لين دخنا وما لقيناه بس لقينا شي يشبه له فقلت يالله معليش يمكن يصلح ..الزبده هو طريقته سهله و توسع الصدر وهي انه جبت كيك جاهز اصفر حق بيتي كروكر وحطيت معه بيضه وحده واصبع زبده لين "او بحرارة الغرفه" يعني ما سويت نفس اللي مكتوب ورا الكرتون ,اللي مكتوب ورا الكرتون ثلاث بيضات وكاس وربع مويه و مدري كم زيت الزبده اني ما سويت زيه وصار بدال ماهو سايل صار مثل العجين "وهازا هو اللي ابيه" المهم قسمت العجينه الى نصين واخذت نصها وفردتها على صينيه "مربعة الشكل" .. بعد تسذا صفيت البسكوت اللي شريته اليوم فوق العجينه بعدين حطيت ميني مارشملوا و مع وايت تشوكلت تشيب و بعدين حطيت النص الثاني من العجينه و حطيت فوقه شوي من حليب نستله المركز عليه ودخلته الفرن تقريبا نص ساعه كذا ويوم طلعته ريحته كانت اججمل شي بالحياة  هذي صورته

طعمه كان مره جميييل وريحته اجمل وكلهم ذاقوه وعججبهم مره بس كل ما اكله احد قال الللهه لو معه قههوه بس!! فعرفت يعني انه حالي شوي =)) والبسكوت كان مره مزين الحلا صراحه طعمه كان بططل

ايه وبس ان شاء الله بكرا بسوي شي ثاني بالبسكوت هذا الخونفشاري ~*.*~ <<عنز بدو طاحت بمريس.. مدري المثل له دخل ولا لا تراني ماقد قلت مثل بمكانه الصحيح هههه , المهم اعتذر على التأخير بتنزيل المدونات بس النت عندي ابو كلب! >والله محد درا عنك روحي نامي بس =))

Cinnamon Muffin with Brown and White Chocolate Chip

اليوم الخامس 

اليوم كنت مره مشتهيه شي فيه وايت تشوكلت عاد قعدت ادور وصفات وكيذا ولقيت كم شي جميل بس كل الحلويات اللي لقيناها حلوه كان معها بسكوت اسمه 

"graham cracker"

وكنت ناويه اني اشتريه واسوي الحلويات الجميله هذي بس ماقدرنا اليوم نشتريه ..ان شاء الله بكرا الزبده..عاد قلت مالي الا اني اسوي مفن *.* ♥♥ عاد انا عشششقي المفن من اجمل الاشياء بالحياة صراحتن *.* احسن من الكب كيك اللي كله كريمه يوجع التسبد -.- ,, المهم عاد قلت خلاص بسويه (˘    ˘) ... وهو اني ذوبت زبده وخلطتها مع السكر الابيض والبني وشوي فانيلا ومع الحليب والبيض وحطيت شي يمكن يصير غريب شوي بس يخلي المفن ششي خونفشاري*.* >> صراحه مدري وش معنى الكلمه بس ودي اقولها =)).. الزبده انه هذا الشي اسمه "ساور كريم" بس بما انه ما عندنا بالسعوديه هذا الشي حطيت زبادي اكتيفيا المخفوق وهذا يشبه له كثير ويسوي نفس المفعول الخونفشاري~*.*~ =)) المهم بعد ما خلطتهم كلهم مع بعض حطيت الطحين والبكينق باودر وشوي ملح وشوي قرفه , القرفه دايم تخلي الشي ججججميل جددن وتطلع طعم التشوكلت وتخليه احلا بعشرين مره بس عاد شوي موب كثير! المهم بعد خلطته كويس حطيت التشوكلت تشيب الابيض والعادي "اقصد التشوكلت البني يعني" بعدين حطيتهم بالصينيه ودخلته الفرن لمدة 18 دقيقه تقريبا .. وايه صح قبل لا ادخله الفرن حطيت فوقه زياده تشوكلت تشيب" عشان الشكل يعني وكذا :$ وطلعت ريحته جمييلااه ~*.*~ عاد هاذي صورته

عاد الطعم كان صراحه مدري كيف اشرح يعني كان جددن جميل يعني موب قصدي امدح طبخي وكيذا يعني اصلا انا عارفه ان طبخي جميل وكذا بس هذا الشي صراحه يعني مدري شقول *.* ♥♥ جممميل مرره  >>احس اني تحمست شوي بالتعبير بس ما يخالف خن اعبر عن شعوري =)) الزبده كلهم عجبهم واخوي عجبه مع انه ما يحب القرفه مره >مدري كيف عايش يعني فيه احد ما يحب القرفااه !! الزبده معليش شوي زادت سماجتي لان فيني النوم وانا اكتب فقعدت اخمبق عليكم شوي هههههههههه ,, وشكرا مررره لكل اللي قاعدين يقرون ياخي والله لو الود ودي كان طبيت عند كل واحد وخميته لين تفككت ضلوعه مير اشوى اني ما اقدر ^^ وااحبيلكم بس (˘      ˘) ♥♥

Mocha Meringue Cookies :D

نعود مقددا "مجددا" باليوم الرابع (˘ ˘) 

اليوم سويت كوكيز وعدته ثلاث مرات 0.0 هو شي غريب شوي اول مره اشوف شي

زي كذا غريب فقلت خن اسويه لأني احب اسوي اشياء غريبه وتسذا يعني .. الزبده

انا اخذت الطريقه من هذي الشخصه 

http://www.youtube.com/watch?v=F0rrmsM21Hk 

بس ما ضبط !عاد انا كنت قاريه اكثر من طريقه لهذا الكوكيز وكلهم يحطون معه شي اسمه 

"Cream of Tartar"

  الا هاذي حقت الفيديو اللي فوق ما حطت :\ .. عاد ما عندنا هذا الشي فقلت خلاص دامها هي ما حطته ومع ذلك ضبط معها! فأكيد حقي بيضبط يعني! بس مع الاسف طلع "حواق :|" طلع سايل وهو المفروض يطلع زي الكريمه والمفروض يطلع ثقيل وكذا الزبده اني كبيته :\ هذي كانت المحاوله الاولى 1~ الزبده عاد سويت واحد جديد بطريقتي انا :$ خلطت بياض البيض مع شووي ملح لمين طلع زي الكريمه بعدين حطيت عليه خليط "السكر مع النشا" ملعقه ملعقه وطلع بالضبط زي الكريمه وجميل وكل ابو شي بس بعدين حطيت الكوكو باودر مع الكوفي وبدا ينسم -.- بدا يصير سايل زي اللي قبله و بدا يخرب بس قلت معليش مالي دخل بحطه يمكن يزين بالفرن =)) المهم عاد يوم حطيته بالفرن لمدة اربعين دقيقه .. يوم خلص طلعته عاد طلع شي ما ادري وشوو يعني الصراحه يحوم التسبد :\ يابس و يقهر كذا مدري وشلون جاي :| وهاذي كانت المحاوله الثانيه 2~  الزبده عاد قلت بشتري هذا "كريم اوف تارتر" واحطه معه يمكن يضبط .. بس كنت خايفه انه ما نلقاه او ما يصير فيه بالسعوديه وكذا عاد راحوا امي واختي يدورونه واشوى الحمدلله لقوه ~*.*~ المهم عاد سويت نفس الكوكيز بس بطريقه مختلفه شوي .. فيه حلا ثاني اسمه

"Pavlova"

 هذا يشبه له إلا حد ما ,بس غير شوي .. هذا الرابط حق الفيديو الثاني

http://www.youtube.com/watch?v=EP4zNAtrMQ0 

كأني دمجت بين الفيديوين  يعني سويت نفس طريقة الفيديو الثاني بس اضفت عليه كوكو باودر مع كوفي وتشوكلت تشيب وزياده بعد حطيت وايت تشوكلت تشيب وخليته كور ..قصدي على شكل كوكيز يعني ^^  الزبده .. هو ضبط صراحه
 طلع منفوخ كذا زي الكريمه الثقيله و شكلها يوسع الصدر عاد حطيتها بالفرن لمدة 40 دقيدزه >>يعني دقيقه >> ي سمجك -.- .. الزبدااه بعد ما خلص من الفرن طلعته وخليته يبرد لمدة عشرين دقيقه عاد يوم ذقته طلع شيءٌ غريب جدن صراحه يعني طعمه كان مرره جميل من الوسط بس الاطراف شوي ميبسه -.- يعني احس لو اسويها مره ثانيه ودي اعدل شي واحد عشان ما يطلع ميبس هو انه إذا خلص من الفرن اطفيه واخليه قاعد جوا الفرن عشرين دقيقه بعدين اطلعه احس كذا بيطلع اجمل شي بالحياة ~*.*~ عاد ان شاء الله بسويه مره رابعه ليين يضبط ويطلع تمام اتمم شي بالحياة *.* 

المهم عاد ذي صورته